काठमाडौं, असोज १ गते ।
नेपाल विद्युत् प्राधिकरणले रसुवा भोटेकोशी नदीमा आएको विनाशकारी बाढीमा बेपत्ता भएका कर्मचारी तथा कामदारका परिवारलाई तत्काल राहत उपलब्ध गराउने भएको छ ।
बाढीका कारण रसुवा, नुवाकोट लगायत क्षेत्रमा १३ वटा जलविद्युत् आयोजनामा क्षति पुगेको छ भने विभिन्न आयोजनामा कार्यरत कर्मचारी तथा कामदार बेपत्ता भएका छन् ।
प्राधिकरण अन्तर्गत मात्रै ४७ जना कर्मचारी तथा कामदार बेपत्ता रहेको प्राधिकरणले जनाएको छ ।
ऊर्जा, जलस्रोत तथा सिँचाइमन्त्री विराजभक्त श्रेष्ठको अध्यक्षतामा बुधबार बसेको प्राधिकरण सञ्चालक समिति बैठकले बेपत्ता कर्मचारी तथा कामदारका आश्रित परिवारलाई तत्काल राहत उपलब्ध गराउने निर्णय गरेको हो ।
सञ्चालक समिति सदस्य अंशुकिरण शाहीका अनुसार बेपत्ता कर्मचारी तथा कामदारको खोजी, परिवारको सामाजिक संस्कार तथा दैनिक जीवनयापनमा सहयोग पुर्याउने उद्देश्यले राहत प्याकेज ल्याइएको हो ।
निर्णय अनुसार बेपत्ता स्थायी कर्मचारी, ज्यालादारी तथा सेवा करारका कामदारका नजिकका हकवालालाई तत्काल राहत स्वरूप ५० हजार रुपैयाँ उपलब्ध गराइने छ ।
त्यस्तै स्थायी कर्मचारीका हकमा प्राधिकरणबाट क्षतिपूर्ति वा अन्य रकम दिने सम्बन्धमा थप निर्णय नभएसम्मका लागि निर्वाह खर्च उपलब्ध गराउने निर्णय भएको छ ।
भदौदेखि बढीमा ६ महिनासम्म बेपत्ता कर्मचारीले पाउने तहको सुरु तलब स्केलको ५० प्रतिशत रकम उनीहरूका नजिकका हकवालालाई उपलब्ध गराइने छ ।
बेपत्ता कर्मचारी तथा कामदारको परिवारलाई तत्काल राहत उपलब्ध गराउने निर्णय गरिएको जानकारी दिँदै सदस्य शाहीले थप क्षतिपूर्तिका विषयमा भने प्राधिकरणले आवश्यक निर्णय गर्ने बताए ।
बैठकमा मन्त्री श्रेष्ठले बाढीमा बेपत्ता भएका कर्मचारी तथा कामदारका परिवारको जिम्मेवारी सरकारको भएको बताए ।
‘हामी एउटै परिवार हौं, यो पैसाले यत्रो ठूलो दुःखको घाउ त निको पार्दैन, तर मलम लगाउने काम गरोस्,’ उनले भने ।
