गोविन्दराज नेपाल
काठमाडौं, कार्तिक ६ गते ।
जनकपुर बोल्ट्स नेपाल प्रिमियर लिग (एनपीएल)को पहिलो संस्करणको च्याम्पियन टोली हो । दोस्रो संस्करणमा ठिक उल्टो नतिजा आयो । जनकपुर जम्मा एक खेल मात्र जित्दै अन्तिम स्थानमा रह्यो ।
मधेश प्रदेशको प्रतिनिधित्व गर्ने जनकपुरले सुरुवाती दुई सिजनमै ठूलो उतारचढाव बेहोरिसकेको छ । पहिलो च्याम्पियन, च्याम्पियन पछिको सिजनमा अन्तिम स्थान, मार्की प्लेअर भन्दा फरक खेलाडी कप्तान बनाउने, मार्की प्लेअर रिलिज गर्ने, विदेशी खेलाडीलाई कप्तान नियुक्त गर्ने जस्ता विभिन्न विशेषता जनकपुर बोल्टसँग छ ।
जनकपुर मार्की प्लेअरलाई कप्तान नबनाउने पहिलो टिम हो भने मार्की रिलिज गर्ने पनि पहिलो टिम हो । पहिलो सिजनमा विकेटकिपर आसिफ शेख मार्की भएपनि जनकपुरले अनिल शाहलाई पहिलो सिजन कप्तान बनाएको थियो ।
पहिलो संस्करणमा लिगमा दोस्रो भएको जनकपुर पहिलो क्वालिफायरमा सुदूरपश्चिमसँग पराजित भएको थियो । तर दोस्रो क्वालिफायरमा कर्णालीलाई हराउँदै फाइनल पुगेको जनकपुरले सुदूरपश्चिमसँग बदला लिँदै पहिलो च्याम्पियन बन्यो ।
दोस्रो सिजन जनकपुरले कमजोर प्रदर्शन गर्दा कप्तान परिवर्तन गर्नेदेखि बेन्चमा राख्नेसम्मको काम भयो । तेस्रो सिजनअघि जनकपुरले अझ बोल्ड डिसिजन गर्यो, मार्की तथा राष्ट्रिय टिमकै विकेटकिपर ब्याटर आसिफ शेखलाई रिलिज गर्ने ।
आसिफ रिलिजपछि जनकपुरले स्पीनर ललित राजवंशीलाई नयाँ मार्की प्लेअर बनाएको छ । ललितसँगै अनिल शाह, मयन यादव, आदित्य महता र विकाश आग्रीलाई मात्र जनकपुरले रिटेन गरेको थियो ।
रिटेन र अक्सन
दोस्रो सिजन जनकपुरले ७ खेलाडी रिटेन गरेको थियो । तर तेस्रो सिजनमा भने त्यसमध्ये अनिल र ललित मात्र रिटेन भए भने दोस्रो सिजन अक्सनबाट अनुबन्ध भएका मयन यादव, विकास आग्री र आदित्य महतालाई तेस्रो सिजनमा रिटेन गरेको छ ।
जनकपुरले आसिफसँगै किशोर महतो, रुपेश सिंह, शुभ कंशाकार जस्ता खेलाडीलाई रिलिज गरेको छ । पहिलो सिजन च्याम्पियन बनेपछि जनकपुरले दुई युवा बलर शेर मल्ल र हेमन्त धामीलाई रिलिज गरेको थियो । शेरले दोस्रो सिजन लुम्बिनीबाट खेल्दै लगातार दुई एनपीएल जिते । हेमन्तले पनि सुदूरपश्चिम रोएल्सबाट दोस्रो सिजन खेल्दै राम्रो प्रदर्शन गरे ।
जनकपुरले तेस्रो सिजनका लागि अक्सनबाट सबैभन्दा धेरै ८ खेलाडी अनुबन्ध गरेको छ ।
जनकपुरले अक्सनमा तृतराज दासलाई १५ लाखमा अनुबन्ध गरेको थियो । तृतसँगै जनकपुरले अभिषेक तिवारी, विशाल पटेल, अमरसिंह रौटेला, रित गौतम, सन्तोष कार्की, आशुतोष पाण्डे र विशाल सुस्लिङलाई अनुबन्ध गरेको छ । मुख्य मिडियम पेसरहरु रिलिज गरेको जनकपुरले अक्सनमा भने ब्याटरमा जोड दिएको छ ।
चार विदेशी खेलाडी अनुबन्ध गर्दा समेत जनकपुरमा विशेषज्ञ फास्ट बलर भने छैन ।
हर्मीत नयाँ कप्तान, नीशमको पुनरागमन र मोइन अलीको आगमन
मार्कीसहित घरेलु खेलाडी फेरबदल गरेको जनकपुरले यस पटक विदेशी खेलाडीमा भने उत्कृष्ट अनुबन्ध गरेको छ । टिमले अहिलेसम्म ४ विदेशी अनुबन्ध गरेको छ ।
अघिल्ला दुई सिजन सुदूरपश्चिम रोयल्सबाट खेलेका अमेरिकन स्पीन बलिङ अलराउण्डर हर्मीत सिंहलाई अनुबन्ध गर्दै नयाँ कप्तान नै बनाएको छ ।
यस्तै पहिलो सिजन जनकपुरलाई च्याम्पियन बनाउन भूमिका खेलेका नीशम फेरि जनकपुर बोल्ट्समा फर्किएका छन् । यस्तै इंग्ल्यान्डका भेट्रान स्पीन अलराउण्डर मोइन अलीललाई समेत जनकपुरले अनुबन्ध गरेको छ भने पाकिस्तानी भेट्रान ब्याटर इफ्तिखार अहमदलाई पनि भित्र्याएको छ ।
जनकपुरले यस पटक एनपीएलमा राम्रो अनुभव बटुलेका दुई खेलाडी हर्मीत र नीशमसँगै अन्तर्राष्ट्रिय स्तरका अनुभवी दुई खेलाडी समेत भित्र्याएको छ । अझै दुई विदेशी खेलाडी अनुबन्ध गर्न बाँकी रहेको अवस्थामा जनकपुरको टिम सन्तुलित बनेको छ ।
आसिफलाई रिलिज गरेपनि जनकपुरमा विकेटकिपरको रूपमा अनिल शाह हुनेछन् । यस्तै अक्सनबाट विकेटकिपर सन्तोषलाई भित्र्याएको छ तर सन्तोषले प्लेइङ सेटमा अवसर कति पाउँछन् हेर्न बाँकी छ ।
जनकपुरका चार विदेशी खेलाडीमा तीन जना अलराउण्डर छन् । हर्मीत र मोइनले स्पीन बलिङ गर्दा नीशमले मिडियम पेस बलिङ गर्छन् । यसले गर्दा बलिङमा पनि सहयोग पुग्नेछ । इफ्तिखारले मिडल अर्डरमा ब्याटिङ गर्नेछन् ।
स्पीनरमा नयाँ मार्की ललित राजवंशी पनि हुनेछन् भने आदित्य महता पनि छन् । हर्मीत र मोइन अली हुँदा जनकपुरको स्पीन डिपार्टमेन्ट बलियो देखिन्छ ।
तर पेस बलिङमा भने राम्रा नेपाली खेलाडी छैनन् । रिटेन भएका विकास आग्री र अक्सनबाट आएका अमर सिंह राउटेला पेस बलिङ अलराउण्डर हुन् । तर दुवै पहिलो रोजाइका बलर भने होइनन् । यी दुई मध्ये एक मात्र पहिलो रोजाइमा खेल्न सक्छन् ।
अलराउण्डर नीशमले पेस बलिङ गर्छन् । अब जनकपुरलाई मुख्य पेस बलर आवश्यक देखिन्छ ।
टप अर्डरमा अनिल शाह, मयन यादव छन् । विकल्प रित र सन्तोष पनि छन् । मिडल अर्डरमा तृतराज दास छन् । मिडल अर्डरमा विदेशी खेलाडी मोइन अली, नीशम, इफ्तिखारदेखि हर्मीतसम्म छन् । आवश्यक परे मोइन अलीले ओपनिङ पनि गर्नेछन् ।
जनकपुरको ब्याटिङ र स्पीन बलिङमा विक्लप भएपनि पेस बलिङ भने कमजोर देखिएको छ ।
जनकपुर बोल्ट्स टिम
रिटेन गरिएका खेलाडी : अनिल कुमार शाह, ललित राजवंशी, मयन यादव, विकाश आग्री, आदित्य महता
अक्सनबाट अनुबन्ध गरेको खेलाडी स् तृतराज दास, अभिषेक तिवारी, विशाल पटेल, अमरसिंह रौटेला, रित गौतम, सन्तोष कार्की, आशुतोष पाण्डे, विशाल सुस्लिङ
विदेशी खेलाडी : हर्मीत सिंह, इफ्तिखार अहमद, जिमी नीशम, मोइन अली
मुख्य प्रशिक्षक : शिवनराइन चन्द्रपल
प्रशिक्षक : मनोज कटुवाल
