काठमाडौं, कार्तिक ११ गते ।
माइकल क्यारिकलाई म्यानचेस्टर युनाइटेडको नतिजामा सुधार ल्याएर आफ्नो जागिर बचाउने मौका दिइएको छ।
उनी आगामी शनिबार चेल्सीविरुद्धको खेलमा मुख्य प्रशिक्षककै रूपमा टोलीसँग रहनेछन्।
युनाइटेडको हालको दयनीय प्रदर्शनलाई हेर्दा फुटबल निर्देशक जेसन विलकोक्स र प्रमुख कार्यकारी ओमर बेराडाको यो निर्णयलाई आश्चर्यजनक मान्न सकिन्छ।
गत आइतबार घरेलु मैदानमा बर्नमाउथसँग ३–० को लज्जास्पद हार बेहोर्नु अघि बुधबार च्याम्पियन्स लिगमा कोमोविरुद्ध टोली ४–१ को फराकिलो हारको सिकार भएको थियो। क्यारिकको नेतृत्वमा टोलीले पछिल्ला १२ खेलमा जम्मा दुई जित मात्र हासिल गरेको छ भने काराबाओ कपबाट पनि ब्राइटनसँग पराजित हुँदै बाहिरिसकेको छ। प्रिमियर लिगमा युनाइटेड १६औं स्थानमा छ, जुन रेलिगेसन जोन (तल्लो डिभिजनमा झर्ने क्षेत्र) भन्दा मात्र एक अंक माथि हो।
यद्यपि, क्यारिकलाई पदमै कायम राख्न जोड दिएका विलकोक्सले ४५ वर्षीय प्रशिक्षकलाई आफ्नो प्रदर्शन र नतिजा सुधार्ने थप अवसर दिन चाहेका छन्। स्टामफोर्ड ब्रिजमा हुने आगामी खेलमा पनि टोलीको प्रदर्शन र नतिजा खराब रहेमा क्यारिकले आफ्नो जागिर जोगाउन सक्ने वा नसक्ने भन्ने अनिश्चित नै छ।
च्याम्पियन्स लिगअन्तर्गत तीन दिनपछि युनाइटेडले रोमाको सामना गर्नेछ भने त्यसपछि अर्को शनिबार लिगमा एस्टन भिल्लासँग खेल्नेछ। क्यारिकलाई दिइएको यो समय सायद विलकोक्सका लागि पनि हो ताकि यदि क्यारिकलाई बर्खास्त गर्ने निर्णय लिइयो भने, उनको विकल्पमा अर्को प्रशिक्षक ल्याउने पूर्वतयारी गर्न सकियोस्।
यदि युनाइटेडले एडी होउलाई मुख्य प्रशिक्षकका रूपमा ल्याउन चाहेमा उनीहरूले न्युकासल युनाइटेडलाई करिब ३० लाख पाउण्ड (३ मिलियन पाउण्ड) क्षतिपूर्ति तिर्नुपर्ने हुन्छ। यदि प्रशिक्षक परिवर्तन गर्ने निर्णय भएमा, विलकोक्सको पहिलो रोजाइमा एडी होउ नै छन्।
गत जुलाईमा न्युकासल छोड्दा उनको सम्झौताका बाँकी सर्तहरूबारे भएको सहमतिअनुसार क्लबले उक्त क्षतिपूर्ति पाउनुपर्ने हुन्छ। साथै, युनाइटेडले हाउका सहायक जेसन टिन्डालको नेतृत्वमा रहेको सहयोगी टोलीका लागि पनि न्युकासललाई केही रकम तिर्नुपर्ने हुन्छ।
यसैबीच, म्यानचेस्टर युनाइटेडका भर्ती निर्देशक क्रिस्टोफर भिभेलले भने जर्मनी र बायर्न म्युनिखका पूर्व मुख्य प्रशिक्षक जुलियन नागेल्सम्यानलाई नियुक्त गर्नुपर्ने पक्षमा जोड दिइरहेका छन्। न्यूज कारखाना
