काठमाडौं, असोज १२ गते ।
केही दिनदेखि जारी अविरल वर्षा रोकिएसँगै काठमाडौं उपत्यकाको जनजीवन सामान्य बन्दै गएको छ ।
देशभरजस्तै काठमाडौंको मौसममा पनि सुधार हुँदै गएको छ । आज बिहान काठमाडौंमा हुस्सु लागेको छ । त्यसैले आज बिहान अलि बढी चिसो महसुस पनि भएको छ ।
मौसमविद विनु महर्जनका अनुसार काठमाडौं उपत्यकामा सोमबार बिहान हुस्सु लागेको छ । अहिले काठमाडौंको पारदर्शिता (भिजिबिलिटी) करिब ८ सय मिटर रहेको उनले जानकारी दिइन् ।
आज बिहान काठमाडौं उपत्यकाको न्यूनतम तापक्रम १६ डिग्री सेल्सियस रहेको छ । दिउँसो तापक्रम बढेर २५ देखि २७ डिग्री सेल्सियससम्म पुग्ने अनुमान गरिएको छ ।
तीन दिनसम्म ठूलो वर्षाको सम्भावना छैन
मौसमविद् महर्जनका अनुसार भारी तथा लगातारको वर्षा हिजोदेखि नै कम भएको छ । आज देशभर आंशिकदेखि सामान्य बदली रहने भए पनि ठूलो वर्षा गराउने प्रणाली तत्काल विकसित हुने सम्भावना नरहेको मौसमविद् महर्जनले बताइन् । आगामी तीन दिनको मौसममा पनि ठूलो वर्षाको सम्भावना देखिएको छैन ।
हिमाली तथा पहाडी क्षेत्रका केही स्थानमा भने क्षणिक र खण्डित वर्षा हुनसक्ने उनले जानकारी दिइन् ।
काठमाडौं उपत्यकामा पनि दिउँसो बादल लाग्ने र केही स्थानमा हल्का तथा क्षणिक वर्षा हुनसक्ने सम्भावना रहेको उनले बताइन् ।
