पब्लिक सन्देश
जनकपुरधाम, साउन ३० गते ।
महोत्तरीको मटिहानी नगरपालिका–७ स्थित प्रसिद्ध धार्मिक तथा ऐतिहासिक स्थल लक्ष्मीनारायण मठमा झुलनोत्सव पर्व तथा मेला
विधिवत् रूपमा सुरु भएको छ ।
धार्मिक, सांस्कृतिक तथा ऐतिहासिक महत्व बोकेको झुलनोत्सवमा सहभागी हुन मटिहानी लगायत छिमेकका स्थानबाट श्रद्धालु तथा भक्तजनहरू सहभागी हुने गरेका छद्धन् ।
श्रावण महिनाको औँसीपछि पर्ने शुक्ल पक्षको तृतीया तिथिदेखि प्रारम्भ हुने झुलनोत्सव जनै पूर्णिमाका दिन धार्मिक विधिअनुसार डोलाको डोरी काटेर समापन गर्ने परम्परा रहेको छ । यस वर्ष शनिवारदेखि सुरु भएको झुलनोत्सव जनै पूर्णिमासम्म सञ्चालन हुने मटिहानी नगरपालिकाका नगर प्रमुख हरि प्रसाद मण्डलले बताए ।
झुलनोत्सवको मुख्य आकर्षण भगवान् राम र सीताको मूर्ति रहेको छ । प्रत्येक दिन लक्ष्मीनारायण मठबाट भगवान् राम–सीताको मूर्ति कलात्मक रूपमा सजाइएको पालकीमा राखेर बाजागाजा, भजन–कीर्तन तथा धार्मिक जयघोषसहित झुलाघरसम्म पुर्याउने गरिन्छ। झुलाघरमा भगवान् राम–सीताको मूर्ति राखी विशेष पूजा–आराधना गरिनुका साथै श्रद्धालु भक्तजनहरूले दर्शन तथा पूजा गर्ने गर्छन् । साँझपख हुने भजन–कीर्तन, धार्मिक गीत तथा विभिन्न सांस्कृतिक गतिविधिले मटिहानीको वातावरण भक्तिमय बन्ने गर्दछ ।
स्थानीय धार्मिक मान्यताअनुसार मटिहानीको झुलनोत्सव त्रेतायुगदेखि नै प्रारम्भ भएको विश्वास गरिन्छ । भगवान् राम र माता सीताको विवाहसँग जोडिएको धार्मिक तथा सांस्कृतिक इतिहास बोकेको मटिहानीमा झुलनोत्सवलाई विशेष महत्वका साथ मनाउने गरिएको छ । झुलनोत्सवका क्रममा भगवान् राम–सीताको दर्शन गर्नाले मनोकांक्षा पूरा हुने तथा धार्मिक पुण्य प्राप्त हुने जनविश्वाससमेत रहेको छ।
नेपालको प्राचीन धार्मिक तथा सांस्कृतिक नगरीका रूपमा मटिहानी परिचित छ । यहाँ रहेको लक्ष्मीनारायण मठ, लक्ष्मीसागर पोखरीलगायतका धार्मिक तथा ऐतिहासिक स्थलका कारण वर्षभरि नै श्रद्धालु तथा पर्यटकहरूको आवागमन हुने गर्दछ ।
विशेषगरी मटिहानीमा झुलनोत्सवको समयमा भक्तजनको चहलपहल बढ्ने गरेको छ। विभिन्न जिल्लाबाट आउने श्रद्धालुका कारण स्थानीय बजार तथा व्यापारिक गतिविधिसमेत बढ्ने गर्दछ । यस पर्वले धार्मिक पर्यटन प्रवर्द्धनसँगै स्थानीय कला, संस्कृति र परम्पराको संरक्षणमा समेत योगदान पुर्याउँदै आएको छ ।
नगर प्रमुख मण्डलका अनुसार झुलनोत्सव मटिहानीको धार्मिक पहिचानसँग जोडिएको महत्वपूर्ण पर्व भएकाले यसको मौलिकता र परम्परा जोगाउँदै व्यवस्थित रूपमा सञ्चालन गर्न नगरपालिका प्रतिबद्ध रहेको छ ।
दैनिक रूपमा हुने धार्मिक कार्यक्रम तथा झुला उत्सवपछि जनै पूर्णिमाका दिन विशेष धार्मिक विधि पूरा गरी डोलाको डोरी काटेर यस वर्षको झुलनोत्सव औपचारिक रूपमा समापन गरिनेछ । समापनका अवसरमा समेत ठूलो संख्यामा श्रद्धालु भक्तजनको सहभागिता रहने अपेक्षा गरिएको छ ।
मटिहानीको धार्मिक इतिहास, मिथिला संस्कृति र परम्परासँग गहिरो रूपमा जोडिएको झुलनोत्सवले स्थानीय धार्मिक तथा सांस्कृतिक पहिचानलाई पुस्तौँदेखि निरन्तरता दिँदै आएको छ । त्यसैले यसको संरक्षण, प्रवर्द्धन र व्यवस्थित व्यवस्थापनमार्फत मटिहानीलाई धार्मिक पर्यटनको थप महत्वपूर्ण गन्तव्यका रूपमा विकास गर्न सकिने स्थानीयवासीको विश्वास छ ।
